Archives départementales de la Mayenne

Contrat de mariage (1652)



Archives de la Mayenne, 1 J 76

Archives de la Mayenne, 1 J 76


Archives de la Mayenne, 1 J 76

Archives de la Mayenne, 1 J 76


Archives de la Mayenne, 1 J 76

Archives de la Mayenne, 1 J 76


Contrat de mariage entre Julien Mille, tessier, et Marguerite Godier, devant Jean Gaultier, notaire royal à Laval, 27 juin 1652

En marge : Mille et Godier

Du vingt septiesme jour de juin mil six cens
cinquante deux après midy, par devant nous Jean
Gaultier, notaire royal résidant à Laval, furent
présens en leurs personnes et deuement establiz René
Mille, tessier, filz de deffunctz Julian Mille
et Marguerite Gosselin sa femme, demeurant en la
rue des Trois-Croix, maison de Jean Lemoyne,
aussy tissier, parroisse de Saint-Vénérand dudit Laval
d’une part, et Marguerite Godier, veufve
de deffunct Jean Belin, aussy demeurante en ladite
parroisse d’aultre part. Lesquelles partyes après submission pertinente ont recogneu avoir faict et accordé
ce qui ensuit, c’est assavoir qu’elles ont promis
se prendre par mariage fiancer et espouzer
en face de sainte églize catholicque apostollicque
et romaine, soubz les clauses et conditions
cy après, qui sont qu’ilz se marient aveq tous
les droictz, noms, raisons et actions qui leur
peuvent competter et apartenir, sçavoir audit
Mille des successions de ses deffunctz
père et mère, et de son péculle particuiller
et à ladite Godier de sa communaulté aveq
ledit deffunct Belin son mary et sur la part

AD53_1J_076_0001

page 1

 

afférante à ladite Godier ès biens de ladite
communaulté et donation à elle faicte
par ledit Belin luy en demeureura censé et
réputé propre et de ses hoirs et ayans cause
en son estoch et ligne la somme de deux cens
livres quand à tous effectz et comme telle
sera par eux reprise lors de la dissolution
de la communaulté des conjoinctz qui
s’acquerra par demeure d’an et jour sur les
plus clairs biens d’icelle et subcidiairement
sur les propres dudit futur espoux qui y
demeurent dès à présent affectez et obligez
et en cas que par l’événement de l’inventaire des
biens de la communaulté dudit deffunct
Belin et de ladite Godier il se trouvast
qu’elle eust vallant une moindre somme que
ladite somme de deux cens livres, ledict
réputé demeurera réduict à ce qui viendra
de clair à ladite future espouze esdits biens.
Sera au surplus ladite future espouze
douairée de douaire coustumier sur tous les
biens dudit futur espoux qui s’y trouverront

AD53_1J_076_0002

page 2

 

 

subjectz les fruictz duquel auront cours
du jour qu’il aura lieu sans qu’il soit besoign
d’en faire demande judiciaire quoyque la coustume
en dispoze aultrement, à laquelle les partyes ont
dérogé en le regard, ce qui a esté voulu et
consenty et les partyes qui à l’entretien se sont
respectivement obligées dont les avons jugées
et condamnées ainsy le tenir. Faict et passé
audit fauxbourg du Pont-de-Mayenne ès présences
de François Edon, cordonnier, vitricq dudit
futur espoux, discretz Me Guillaume Belliere,
prêtre, et Me Guillaume Troussard, aussy prêtre,
demeurantz audit Laval, tesmoigns qui sont
signez aveq nous notaire en la minute
des présentes, et ont lesdits futurs espoux
dict ne sçavoir signer.

(Signé :) Gaultier.

AD53_1J_076_0003

page 3