Retour

Archives départementales de la Mayenne
Mentions trouvées dans les registres paroissiaux et d'état civil

Renazé

 
   
 
   

1613 - Baptême de cloches
(le Bourg-aux-Nonnains)

   
   
 
   

Signalé par Philippe Gondard (2010-07-16)

 
   

Registre BMS 1570-1686 (vue 1/226)

 
 

Transcription par Philippe Gondard

 
   
 
 
 

Le mardy des Rogations quatorziesme jour de may l’an mil six centz
treze fut faict la fonction de la cloche du Bourg aulx Nonnains en
l’eglize de Saint Saulveur de Segré avecques une aultre cloche
de ladicte eglize de Segré, icelle pesant sept vingtz dix libvres ; et a cousté
pour la fonction et augmentation de metail la somme de quarente [cinquante rayé]
et sept libvres cinq sols sans comprendre les fraitz, peinnes et vacations.
Et le semdy ensuivent vingt et cinqiesme jour de may qui estoit
la vigille de Pentecouste an susdit fut faict la benediction de ladite
cloche par moy curé dudit Bourg assisté de discreptz missires Pierre Guerrif
et Jan Moreau pretres demeurantz en Renazé. Furent parein et  mareinnes
honorables personnes Françoys Crosnier sergent royal sieur de la Jaunays,
Michele Ogier dame de la Saullaye, Janne Le Maczon dame de la
Fontainne, presents touz les habitans et plusieurs et aultres personnes ;
lequel parein par l’advis de tous autres ont nommé ladicte
cloche Marye pour l’honneur de la Vierge Marye dont nostre
eglize est fondée en louant Dieu nous avons chanté après
ceste saincte et solennelle benediction devant le grand autel
à l’honneur de la Vierge Marye et Jesuz Christ son filz qui sont
escriptz sur ladite cloche F. Regina Celi Letare. Faict le vingt et
cinqiesme jour de may l’an 1613.

(Signature)
F. Hunault
1613

 
   
 
   

1638 – Prestation de serment d'une sage-femme

   
   
 
   

Signalé par Valérie Duroy (2007-02-07)

 
   

Registre BMS 1570-1686 (vue 145/226)

 
 

Transcription par Valérie Duroy

 
   
 
 
 

Perrinne Hamon, chrestienne par la grace
de Dieu, a ce dimanche dernier jour de
janvier l'an mil six centz trente et
huict faict promesse à Dieu et à l’Eglise
notre saincte mere d'assister bien et deument
les femmes en leurs accouchementz, de
procurer la santé et conservation des meres
et enfans à sa puissance davant nous curé
du Bourg aux Nonains soubzsigné.

(Signature)
P. Bodier

 
   
 
   

1649 - Fonte et bénédiction des cloches

   
   
 
   

Signalé par Valérie Duroy (2007-02-07)

 
   

Registre BMS 1570-1686 (vue 169/226)

 
 

Transcription par Valérie Duroy

 
   
 
 
 

(page gauche)

Le mardy cinquiesme jour de janvier l'an
mil six centz quarante et neuf en l’eglise
du Bourg aux Nonains, a esté faicte la
benediction des cloches dudit lieu par le venerable
curé de la Chappelle Heuslin soubsigné, ès presence
de nous François Bodier pretre curé dudit Bourg aux
Nonains, bachelier en droict canon, Me Pierre
Girard, pretre vicaire de la Bouessiere soubzsigné ;
à la grosse desquelles cloches a esté imposé
le nom de Renée par noble homme René
Fauveau sieur de Lhommeau, et damoiselle

(page droite)

Renée Demallereault soubzsignés ; et à l’inferieure
a esté donné le nom d'Anne par honnorables
personnes Hardouin Le Mettayer procureur de la
reverende abesse de Nioyseau et damoiselle
Louyse Le Mesle espouse dudit sieur de Lhommeau
soubzsignés. Ont esté refaictes lesdites cloches
par Me Jehan Barier maître fondeur loren soubzsigné,
en presence des soubzsignés.

(Signatures)

R. de Malleraux
R. Fauveau
Louise Lemesle
H. Lemestayer
P. Girard

Barié
fondeur

 
   
 
   

1667 - Bénédiction de la petite cloche

   
   
 
   

Signalé par Valérie Duroy (2007-02-07)

 
   

Registre BMS 1570-1686 (vue 206)

 
 

Transcription par Valérie Duroy

 
   
 
 

Benediction
de la petitte
cloche

Le siziesme jour de feubvrier mil six cens
soisante et sept en l’eglise du Bourg au
Nonnains, par nous pretre curé et vicaire
de l’hospital de Bouillé soubzsigné
a esté faict la benediction de la petitte
cloche. Et a nom ladite cloche Catherine.
Et ont esté parain François de Lustin
escuier sieur de la Loyère, et maraine
Jeanne Suhard, femme de Guy Allaman
sieur de Bribace.

 
   
 
   

1696 - Prestation de serment d’une sage-femme

   
   
 
   

Signalé par : Archives de la Mayenne (Source : abbé Gernigon) (2006-08-10)..

 
   

Registre BMS 1695-1719 (vue 16/248).

 
 

Transcription complète.

 
   
 
 
Serment de la
femme
Hunault
matrone
Aujourd'hui deuxieme aout mil six cent quatre vingt
seize, Jullienne Raude veuve Hunault de cette paroisse, a presté
serment devant nous prestre faisant les fonctions curialles
de cette parroisse de Renazé, en la forme et maniere prescripte dans
nostre rituel, après nous estre enquis de ses vices et mœurs et de la
suffisance requise pour l'administration du sacrement de baptême en
cas de besoin en qualité de matrone dont elle a presté serment ainsi
qu'il est dit pour assister les femmes en travail d'enfant. Et ont esté presens
audit serment Charles Bordere, demeurant en ce bourg, soussigné
et Jean Vitel, laboureur demeurant au Bois Pepin en cette paroisse, qui ne sçait
signer de ce enquis, et nous prestre susdit et soussigné. Gloze : pour.
Rature : un mot nul.

(Signatures :)
C. Bordere | L. Hardy

 
   
 
   

1700 - Bénédiction de la petite cloche

   
   
 
   

Signalé par Valérie Duroy (2000-12-26)

 
   

Registre BMS 1695-1719 (vue 52/248)

 
 

Transcription par Valérie Duroy

 
   
 
 
 

 (page gauche)

Le vingt et troisiesme jour de decembre l’an 1700
la petite cloche de ceans (a) esté benie par nous
curé soussigné et a esté nommée Philippe Jacquine
et Renée par messire Philippe Dandigné
chevalier seigneur des Escotais et de ceans,
et damoiselle Jacquine Renée Dandigné de
Montauger. À laquelle ceremonie a assisté
messire René Joseph Dandigné fils aisné
dudit seigneur des Escotais pour la maladie
de son pere et ce en presence des soussignez.

(Signatures)

Jacquine Renée Dandigné
Dandigné des Escotais
…..

(page droite)

François Dandigné
Nöemie Lenormant
Janne Daniel
F. Charbonnier
François de Charbonnier
Dandigné
Cadorau
Florent Broüilly
p. c. ind. [prieur curé indigne]

 
   
 
   

1715 - Bénédiction de la petite cloche

   
   
 
   

Signalé par Valérie Duroy (2000-12-26)

 
   

Registre BMS 1695-1719 (vue 175/248)

 
 

Transcription par Valérie Duroy

 
   
 
 

Benediction
de la cloche

Le vingt huitieme jour d’aoust de l’année mil sept cent quinze
la petite cloche de ceans a eté benie par Mre Pierre Mauslion
pretre curé de Chalain et cheptier du chapitre de Saint Loüis
du Tramblay soubsigné, de la permission de monseigneur
l’evesque d’Angers et consentement du sieur curé de Renaz[é.]
Et a esté nommée Renée par messire Joseph René Dandig[né]
chevallier seigneur des Escotais et de ceans et dame
Catherinne Artauld veufve de messire Jouachim de Gancia[n]
chevalier seigneur d'Erigné, Meurs et autres lieux ès
presence des soubsignés.

(Signatures)

Arthaud 
Dandigné des Escotais
P. Maurice

 
   
 
 
Haut